Ugrás a tartalomhoz

Régi magyar irodalmi szöveggyűjtemény I.

Ács Pál (1954–), Jankovics József (1949–), Kőszeghy Péter (1951–)

Balassi Kiadó

222

222


      Tribrache, candentes (si nos ea cura teneret)
          de Rubris gemmas erueremus aquis,
      gentibus ex Arabum varios peteremus odores,
          vellera Ser nobis mitteret, Indus ebur.
 5   Nunc animum capiant cum tantum carmina nostrum,
          Non nisi ab Oenotriis poscimus illa plagis.
      Vobis ingenium, vobis dedit ore rotundo
          Musa loqui; externi barbara turba sumus.
      Nec Geticum Pallas colit aut Cyllenius Histrum,
10       sed Phaethontei brachia amoena Padi.
      Histrum concreto vectantem proelia dorso
          Mars colit et Martis sanguinolenta soror.
      At frustra mendico procul, quis solus abundo,
          scilicet Ausonia clarus et ipse lyra.
15   Dicunt pastores; sed non ego credulus illis,
          inter nam cygnos anseris ore crepo.
      Quodsi non etiam prorsus triviale sonarem,
          haud ideo legerem vestra, Tribrache, minus.
20   Ipse Maro assidue Varium Flaccumque terebat;
          non bene se novit, cui sua sola placent.